Wednesday, August 5, 2009

..............

அன்று ஒரு நாள் மாலை
மழைப்பறவைகளின் மொழியை
தலை கோதியவாறு விவரித்தேன்
வாய்பேச இயலாச் சிறுவனிடம்

நேற்றுக்கூட
வானவில்லின் புதிய நிறமொன்றை
பிரித்துக்காட்டினேன்
பின்தெரு பார்வையற்றவளிடம்

இதோ
உதட்டசைவுகளை
உற்று கவனிக்கும்
இந்த காது கேளாதவனுக்காக
எனது தனிமையின் பாடலொன்று

.....

விபத்தில்
ஒரு கால் இழ‌ந்த
பக்கத்துவீட்டு சிறுமியிட‌ம்
வாக்குக் கொடுத்திருக்கிறேன்
நாளை புல்வெளியில்
ஓடி விளையாட‌லாமென

கிளைகளை வளைத்து
பசுந்தளிர்களை தட‌வியதிலிருந்து
முற்றத்து மரமும்
என்னுடன் பேச ஆரம்பித்துவிட்டது

ம்ம் உங்களுக்கும் சொல்லித‌ரவா?

அன்பின் எளிய‌ வெளிப்பாடுக‌ளில்
எதையும் சாத்திய‌மாக்கும்
வித்தையொன்றை?

1 comment:

யாத்ரா said...

ஐயோ உங்கள் அன்பு மழையில் நனைகிறேன் நளன்.

அருமை.