Friday, March 29, 2013

இலைகளில் அதிரும் மழை

நீ அருகிலில்லாத‌ இன்று
எல்லா வேளைகளிலும் பெய்கிறது மழை
எல்லா வேளைகளிலும்

இந்த மழை நாளில்
தொலைபேசியில் என் மனமதிரச்செய்யும்
உன் குரலுக்காக காத்திருக்குமிவ்வேளையில்
கண்ணாடிகளில்
உடைகிறது இக்காலநிலை

நடுங்கிக்கிடக்கிறன பறவைகள்

சாம்பலும் கருமையிலும் நிரம்பிய வீதிகளில்
கணத்த நெஞ்சுடன் சும்மா நடக்கிறேன்
பின்
கொட்டும் மழையில்
பாசிப்படர்ந்த மொட்டைமாடி படியில் அமர்ந்திருக்கிறேன்

எனைப் பற்றி படர்கிறது குளிர்

கடல் மீனின் உலகென மிகவும் சிக்கலானதிவ்வாழ்வெனினும்
நான் இன்னும் மீதமிருப்பது உனதன்பால் மட்டுமே

வெகுதூரமிருக்கும் நீ
இக்கணம்
என்னை நினைத்துக்கொள்வாயா

நேற்றைய நமது கசப்பான உரையாடலை
நினைத்தபடி பார்த்திருக்கிறேன்
ஏதுமற்ற ஒன்றை.

மழையின் குரல்
இலைகளில் அதிருகிறது